គិតត្រឹមថ្ងៃអាទិត្យ ទី៣០ ខែមីនា ឆ្នាំ២០២៥ ស្ថានភាពនៅភាគខាងជើងប្រទេសថៃនៅតែបន្តធ្ងន់ធ្ងរដោយសារភ្លើងឆេះព្រៃដែលមិនទាន់អាចគ្រប់គ្រងបាន។ ជាពិសេសនៅខេត្តឈៀងម៉ៃ អាជ្ញាធរបានរាយការណ៍ថា មានចំណុចក្តៅ (hotspots) ចំនួន ១៧៦ កន្លែង ដែលក្នុងនោះស្រុក Chiang Dao តែមួយ មានចំណុចក្តៅរហូតដល់ ៥៨ កន្លែង។ ភ្លើងឆេះព្រៃដ៏ខ្លាំងក្លានេះបានបង្ខំឱ្យអាជ្ញាធរត្រូវជម្លៀសប្រជាពលរដ្ឋជាច្រើននាក់ចេញពីតំបន់មានគ្រោះថ្នាក់។
តាមពិតទៅ អគ្គិភ័យនេះបានផ្ទុះឡើងតាំងតែពីពាក់កណ្តាលខែមីនាមកម្ល៉េះ ប៉ុន្តែស្ថានភាពហាក់កាន់តែយ៉ាប់យ៉ឺនដោយសារលក្ខណៈសណ្ឋានដីដែលស្ងួត និងខ្យល់បក់ខ្លាំង។ កត្តាទាំងនេះបានធ្វើឱ្យអណ្តាតភ្លើងរាលដាលកាន់តែលឿន និងពិបាកគ្រប់គ្រង។ ក្រុមអ្នកពន្លត់អគ្គិភ័យ និងអាជ្ញាធរកំពុងប្រឹងប្រែងអស់ពីលទ្ធភាព ប៉ុន្តែភ្លើងនៅតែបន្តឆាបឆេះយ៉ាងសន្ធោសន្ធៅ។
ប្រភព៖ Bangkok Post
